Ubuntu Basque Experience

Audio formatuen asuntoa sigletan galtzeko moduko baso iluna da niretzat: OGG, MP3, ACC, MP4, WAV, FLAC,.. (Ematen du Eusko Legebiltzarrerako alderdien zerrenda, kar, kar,...). Gaur beste berri bat aurkitu dut (APE) eta nire ekipoak ezin du fitxategi hauek erreproduzitu (ordenagailuan bai baina musika ekipoan ez) beraz, beste formatu batera bihurtu behar izan ditut. Baina zer da APE? Nola bihurtu adibidez MP3 formatura?

Multimedia formatuei buruzko informazio oso ona aurkitu dut "La máquina diferencial" blogean gazteleraz.

Bertan aurkitu dut baita ere nola egin behar dudan bihurketa. Dena den nik horri helduta, ez dut behar izan horrenbeste gauza egin. Hemen doakizue nire Ubuntu esperientzia.

Horretarako Sound-converter instalatu dut betiko moduan:

# apt-get install soundconverter

Behin abiarazita ondorengo panaila agertuko zaigu:

Add file edo Add folder aukerekin bihurtu nahi dituzun fitxategiak aukeratu eta Bihurtu aukeran klikatu aurretik Edit aukeratu eta bertan konfiguratu behar ditugu gure bihurketaren aukera guztiak irudian ikusten dugun moduan.

Hau hain erraz egiteko uste dut pluginak instalatuta ditudalako dela "La máquina diferencial" azaltzen duten moduan eta bihurketaren bat ez badabil pluginen falta izango delakoan nago. Oraingoz oso ondo egiten dit bihurketak.

Distrowatch GNU/Linux distribuzioen munduan gertatzen diren berrien ispilua dugu. Urtero ateratzen dute distribuzioen Rankinga eta aurten ere Ubuntu errege.

Ranking hau ez da oso serioa, zeren eta beraiek sortutako distribuzioei buruzko estekei klik eginda kontatzen bait dute, dena den adierazle moduan hartu dezakegu, ez?

Sare bat badaukazu Ubuntu GNU/Linuxeko eguneraketak denak batera egiten baditugu (adibidez eskolako bateko gela batean) Internetera doan trafikoa ugaritu egingo da eta eguneraketak moteldu egingo dira.

Kasu hauetan apt-cacher erabili dezakegu eguneraketak azkartzeko.

Aplikazio hau Perl lengoaian idatzitako script bat da eta CGI bat bezala  exekutatzen da Apache web zerbitzarian eguneraketa paketeen katxea eginaz.

Sistemak katxe-zerbitzari bat behar du sarean eta bertan  apt-cacher instalatuko dugu. Orduan sareko ordenagailu batek eguneraketa bat behar duenean CGI aplikazioak  bere katxe direktorioan (normalean /var/cache/apt-cacher) dagoela egiaztatuko du eta horrela bada zuzenean bidaliko dio Interneteko errepositorioetara konektatu barik.

Horretarako sareko ordenagailu guztietan /etc/apt/sources.list fitxategia aldatu behar da. Ikus dezagun nola konfiguratu aplikazio hau.

KATXE-ZERBITZARIAREN KONFIGURAZIOA.

Lehengo pausua aplikazioa instalatzea izango da. Horretarako, betiko moduan egingo dugu: apt-get install apt-cacher.

Kontuan izan aplikazio honek mendekotasunak dituela apache, perl eta wget paketeekin beraz ez baditugu, instalatu egingo dira.

Behin instalatuta dagoenean, doitze batzuk egitea komeni da. Horretarako /etc/apt-cacher/apt-cacher.conf fitxategia editatu behar dugu. Normalean balore guztiak ondo daude, baina interesgarria izan daiteke ondorengoak aldatzea:

generate_reports=1

Honek trafikoaren informeak sortuko ditu helbide honetan: http://katxe-zerbitzariaren-IPa/apt-cacher/report

expire_hours=24

Honek Packages eta Release fitxategiak jaitsiko ditu 24 ordu baino gehiago badute

Bestalde Internetera konektatzeko zure sareak proxy bat erabiltzen badu lerro hauek doitu beharko dira:

http_proxy=proxy.example.com:8080

use_proxy=1

Behin pausu hauek egin eta gero sistema ondo dabilela frogatu dezakegu helbide honetan: http://katxe-zerbitzariaren-IPa/apt-cacher/ aplikazioaren konfigurazioa agertzen bada.

SAREKO ORDENAGAILUEN KONFIGURAZIOA.

Sareko ordenagailuetan /etc/apt/sources.list fitxategia editatu behar da eta lerro bakoitzean  katxe-zerbitzariaren helbidea jarri behar da ondorengo adibidean ikus dezakegun moduan:

# Originalak
#deb http://archive.ubuntu.com/ubuntu/ intrepid main restricted
#deb-src http://archive.ubuntu.com/ubuntu/ intrepid main restricted

#Berriak

deb http://katxe-zerbitzariaren-IPa/apt-cacher/archive.ubuntu.com/ubuntu/ intrepid main restricted
deb-src http://katxe-zerbitzariaren-IPa/apt-cacher/archive.ubuntu.com/ubuntu/ intrepid main restricted

Eta zertarako erabiltzen dut wine?

Orain dela urte bat DVD grabatzaile bat erosi nuen (KISS DP558). Disko  gogorra dauka eta baita Ethernet konexioa ere. Oso erabilera "potentea" eskaintzen du: telebista grabatu disko gogorrean, Internet bidez irrati tematikoak entzun eta baita zure ordenagailuan dituzun bideoak, mp3ak edo irudiak ikusi ditzakezu. Horretarako Pc-Link programa erabiltzen du eta programa hori ez dabil GNU/Linux sistema eragilean.

Horretarako erabiltzen dut wine.

Instalazio programa wine-tik eskuragarri dagoen karpeta batean jarri eta exekutatu. Orduan instalazioa normal exekutatuko da eta programa gure Aplikazioak menuan agertzen zaigu, erabilgarri.

Irakasle lanean gabiltzanok askotan erabiltzen ditugu zerrendak gure eguneroko lanean. Gaurko honetan ikusiko dugu nola banandu OpenOffice Calc programarekin egindako kalkulu orri bateko zutabe batean dauden datuak bi zutabetan. Hau da, hasiera batean irudiko datuak baditugu:

Azkenean honela agertuko beharko dira:

Lehenengo eta behin abizena eta izenaren artean zuriunerik egongo balitz ezabatu egin beharko genuke. Horretarako Menuan aukertauko dugu Editatu eta ondoren Bilatu eta ordeztu ondorengo lehioa agertuko zaigu:

Bilatu laukitxoan koma eta zuriunea idatziko ditugu. Ordeztu honekin laukitxoan bakarrik koma eta ondoren Ordeztu denak botoia sakatu.

Gero, aldatu nahi dugun zutebea aukeratuko dugu saguarekin eta kontuan izanda eskumako zutabea libre egon behar dela, Menuan Datuak eta Testua zutabetara aukeratuko ditugu. Honen ondoren lehio hau agertuko zaigu:

Bertan Koma bakarrik aukeratuko dugu, Ados botoian klikatu eta listo!

Espero dut erabilgarria izango duzuela.

Batzutan gerta dakiguke programa bat ez egotea GNU/Linuxerako eta erabili behar izana. Orduan aukera desberdinak ditugu: abio sistema duala, birtualizazioa edo baita wine erabiltzea.

Wine erabiliz Windowserako prestatuta dauden programak erabili ditzakezu GNU/Linux sistematan.

Wine instalatzeko era asko ditugu baina agian errazena terminala erabiltzea da. Orduan, terminala abiarazteko menuan aukeratuko ditugu:

Aplikazioak > Gehigarriak > Terminala

Ondoren  administratzeko pribilegioak lortubehar ditugu, horretarako terminalean idatziko dugu:

$ sudo -s

eta gure pasahitza sartuko dugu. Ondoren errepositorioaren gakoak sartu behar ditugu gure konfiazntzazko apt zerrendan horretarako terminalean ondorengo komandoa kopiatuko dugu:

# wget -q http://wine.budgetdedicated.com/apt/387EE263.gpg -O- | sudo apt-key add -

Ondoren   Wine-ren errepositorioak sartuko ditugu gure sources.list fitxeroan ondorengo komandoarekin:

# sudo wget http://wine.budgetdedicated.com/apt/sources.list.d/intrepid.list -O /etc/apt/sources.list.d/winehq.list

Aurreko komandoa Ubuntu 8.10 Intrepid Ibex erabiltzaileentzat da. Beste bertsio batzuetako erabiltzaileak begiratu komandoa webgune ofizialean.

Orduan paketeen informazioa gaurkotu:

# apt-get update

Eta ondoren instalatu:

# apt-get install wine

Orduan Aplikazioak menuan agertuko zaizu. Hurrengo batean azalduko dugu nola erabili Wine aplikazio konkretu batekin

Aurreko sarrera bateko komentarioetan jolausek azaldu zuen arazo batzuk zeuzkala audioarekin. Laneko portatilean nik ere arazo berdina, edo gutxienez antzekoa, neukan.

Gaur ibili naz asunto horretan eta, egia esateko, ez dakit nola edo zergatik baina konpondu dut arazoa.

Ubuntu Intrepid Ibex hasieratik instalatu berri nuen laneko portatilean eta ordutik ona audio ez zebilen.

Gaur Sistema > Hobespenak > Bolumen-kontrola aukeratu dut eta Hobespenak botoian klikatuz aukera guztiak gaitu ditut.

Kontrol batzuei bolumena jeitsi, beste batzuei igo eta audio martxan daukat.

Hori egin eta gero klaska moduko bat entzuten zen noizean behin. PC Speaker mututu eta listo.

Dena den sistema berabiarazi arte audio ez da joan guztiz fin.

Momentu honetan Bolumen-Kontrola irudian agertzen de moduan daukat eta audioa oso ondo dago. Irudia ondo ikusteko gainean klikatu.

Blog hau hasi aurretik beste erabaki bat hartuta neukan: Red Hat GNU/Linux utzi eta Ubuntura pasatzea. Tartean probatuta nituen Fedora eta baita Debian ere, baina Ubunturen erraztasunak erakarri nindue.

Beste erabaki bat ere dagoeneko hartuta zegoen: nire ordenagailu biak (lanekoa eta etxekoa) euskaldunak izango ziren.

Ordurako nik idazten nuen beste blog batzutan ere. Argi neukan laguntza beharko nuela; beste erabiltzaile batzuk ere agian nire moduko erabakiak hartuta eukiko zuten, horregatik nire apunteak (Basque Experience-ak) publikoki hemen uztea ona izango zela pentsatu nuen.

Hasiera batean blog honek ez zituen irakurle askorik. Agian ez ginen/gara asko Ubuntuko Basque Experience-ak ditugunok. Dena den, urtarriletik ona  bisitari kopurua bikoiztu egin da (urtarrilean: 336 / azaroan: 776) eta azken egunotan blog honetan izan ditugun iradokizun edo komentarioak asko ugaritu dira era politean gainera.

Horregatik proposamen bat egitera natorkizue: norbaitek nahi ditu bere Basque Experience-ak publikatu?

Nire ideia blog hau blog pertsonal batetik, talde blog batera pasatzea litzateke. Horrela Experience-ak zabalagoak izango litzatekezela uste dut.

Adibidez, artikulu bi hauetan [1] [2] komentarioetan agertzen den informazioa, sarrera batzuk egiteko modukoak dira nire ustez.

Zer deritzozue?

Prest bazaude jarri nirekin kontaktuan komentario bat eginez edo goiko esteka erabiliz (idatzi nahi badidazu esteka).

Orain dela egun batzuk komentatu nituen nire lehenengo inpresioak Ubuntu 8.10 nire etxeko ordenagailuan eguneratu eta gero. Gaur laneko portatilean egin dudan eguneraketa komentatuko dut.

Nire lehengo inpresioa nahiko txarra izan zen, eguneraketa tipikoa egiten saiatu nintzen eta gauzak ez ziren ondo joan, ingurune grafikoa ez zen abiarazten eta itzaltzerakoan ez zen itzaltzen (eta orain ere batzutan ez da itzaltzen). Beraz, sistema hasieratik instalatu nuen.

Eta gauzak nahiko ondo joan dira: nire /home aparte muntatuta daukat, beraz konfigurazio pertsonal guztiak martxan ditut; sistema grafikoa azko hobetu da.

Dena den, gauza batzuk ez dira hain ondo joan: VPNak egiteko aukera galdu nuen, haririk gabeko sarea galdu nuen eta sistema ezin dut itzali (Sistema "Shutting down ALSA" mezuarekin geratzen da). Hortaz aparte soinu txartela ez doa fin.

VPN konexioarena eta haririk gabeko sarearena konpondu ditut. Besteak ea laster lortzen ditudan.

Atzo ustekabeko galanta hartu nuen nire lankide batek esan zidanean: "Hi, irakurri duzu gaurko Berriako 53 orrialdea?"

Ez neukan irakurrita eta egunkaria hartu, 53. orria bilatu eta, ara non aurkitzen dudan blog honen sarrera bat hitzez-hitz publikatuta. Hori bai, iturriaren erreferentzia egina zegoen.

Niretzat ohore bat da Berriak nire artikulu bat interesgarritzat hartzea eta publikatzea, baina prozedura ez zait batere egokia iruditu. Nik ez nekien artikulu hori publikatuko zela eta inork ez dit baimenik ere eskatu. Nik emango nien. Esan dudan bezala niretzako ohore bat delako baina, beti jarraitzen dute prozedura hori? Eta autoreak ez badu gogoko publikatzea?

Sustatun ere hartu zidaten beste sarrera bat baina haiek beste prozedura bat jarraitu zuten: nirekin kontaktuan jarri, galdetu zer iruditzen zitzaidan publikatzea, baimena eman eta horren ondoren publikatu.